MKALI wa Hip Hop nchini, Ambwene Yessaya, maarufu kama AY, amewaponda
mapromota wa Kitanzania wanaoishi nje ya nchi akidai kuwa ni wababaishaji.

Kauli hiyo ilikuja alipokuwa akizungumzia mipango ya safari ya yeye na Mwana FA kwenda kufanya maonyesho nje ya nchi. "Haieleweki ingawa tayari tuna visa mkononi na huenda hata muda wa visa zenyewe ukaisha hivi hivi. Kweli huwa siwapendi mapromota wa Kiswahili wanaoishi Ulaya, miyeyusho tu," alisema AY anayetamba na kibao cha Queens of Kings.

AY aliweka wazi kuwa hufurahi kufanyakazi na mapromota wa Uganda
akisema hawana uongo uongo. "Wako ‘committed’, kwao kazi ni kazi tofauti na ndugu zetu," alisema.

Kufa kwa safari hiyo kumewafanya wajipange kufanya onyesho la pamoja
Bagamoyo mwezi ujao kabla ya kuanza kwa Mwezi Mtukufu wa Ramadhan.